D’Weltwuche veröffentlicht en Artikel drüber, dass mir angeblichi T-Shirts mit de verlöcherte Jesus & Maria Ikone verkaufet. De Autor, Philipp Gut, hät sich üsi Fake Siite agluegt, wo mir als Rage Bait für Telegram Schwurbler baschtlet händ, und häts ohni Nahfröge oder minimali Recherche für echt befunde.
Letscht Wuche, am 11. September, han ich folgendes uf Twitter akündigt:
Wür so en linksextreme, ifältige, undankbare und respektlose Usländer wie ich das würklich mache? Nei. Ich bin zwar unhinged und han d’Kontrolle über mini destruktive Impuls verlore, aber SO unhingend bin nödmal ich. Wenns aber nach de angebliche Journaliste vo de Weltwuche gat bin ich de Anti-Christ.
Wieso überhaupt mit fake T-Shirts provoziere?
Mängi erinneret sich no a Lichtmacher, d’fake Anti-Impf Siite mit dere ich zu Corona Ziite unter anderem Xavier Naidoo, Ärzte für Aufklärung und dutzendi wiiteri Schwurbelstars verarscht und exposed han. Jede wo sich mit mim Content i de letschte Jahr nur scho es bitz befasst hät, weiss, dass ich die rassistische Alleswüsser uf Telegram gern zämme mit minere Community verarsche.
Wo mir scho bi dem Thema Verarsche und Expose sind:
Throwback zu de Ziit als mir die erhabene Selbstdenker über üsen öffentliche Chat tatsächlich glaube la händ, ich wär en Antifa General wo üsi unendliche Heerschaare durch Geldgeber us em Staat finanziert und kommandiert. Eini vo de Hauptverbreiterinne vo dem Schizo-Bullshit isch Joyce Küng gsi, zuefälligerwiis (oder au nöd) au e Weltwuche Autorin.
Fast Forward zu 2024: De extrem und vor allem fabriziert Giga-Outrage zum Baby Jesus-Zwüschefall wird vo Rechte und Schwurbler koordiniert.
Wer würklich denkt, sie hät das trotz ihrere sofortige Entschuldigung us Boshaftigkeit gmacht, hät entweder scho länger es Problem mit ihrere Person, oder hät sich scho lang im paranoide und rassistische Abgrund vo Telegram und Post-Elon-Twitter verlore. List me de Diskurs über das Thema uf dene zwei Plattforme, hät Sanija trotz ihrere Entschuldigung im beschte Fall d’Usschaffig und im schlimmschte Fall de Tod für ihren Fehler verdient. Im Gegesatz ischs Thema bi Mensche, wo nöd chronisch online uf Telegram und Twitter sind, scho gesse.
Wie viel schlimmer chöntet üsi Schwurblis überhaupt no reagiere wenn das öpert fiiret, aber ohni dass es ihm Leid tuet?
De perfekt Nährbode zum die rechte Schwurbler und Rassischte so richtig z’verarsche, sie glichzitig hässig z’mache und Kaugummi z’kätsche. Und ich han verfickt nomal kein Kaugummi me.
Fake-Shop wird is Lebe grüefe
D’Idee defür isch de kollektive sputim-Community Schwarmintelligenz uf Discord z’verdanke. Während mir üs über die übertribene Reaktione und de fabriziert Outrage luschtig gmacht händ, isch eme Chatter e diabolischi Idee cho:
Wie uf em Screenshot z’gse isch, han ich mich dezue entschiede das ganze uf de offizielle sputim.ch Domain durezieh, us eim guete Grund: Schwurblis und SVPler hasset mich, spötischtens sit Lichtmacher.
Nur scho de Fakt, dass es de verfluecht Sputim isch wo die angebliche Shirts verkauft, wird die «Selbstdenker» in e rechtschaffeni, vo Xenophobie atriebeni Rage versetze. Es wird sie atriibe zum mich und min tüüflische Shop für Linksextremischte «expose». So han ich mir das zumindescht vorgstellt.
Da ich han wölle, dass de Fake Shop gezielt bi de Schwurblis uf Telegram teilt wird, han ichs nur uf Twitter posted und susch nirgends verlinkt. Uf Twitter leset nämlich d’Schwurblis und SVPler min Shit, und zwar viil meh und öfter als d’Lüüt wo mich gern händ! (Gits eu überhaupt?)
Inhalt uf em Fake Shop
De «Shop» chönt für durchschnittlichi Telegramnutzer oder en DAU echt usgse, aber das isch au s’Ziel gsi. Vo öpertem wo sich Journalist nennt, söt me aber zumindescht e chlini Nuance vo Mediekompetenz erwarte chöne:
- Me hät nie chöne irgendöpis Bstelle, vo Afang a isch alles «usverkauft» gsi. (Ich han vom erschte Moment als d’Siite online gsi isch, e Kopie im Web Archive erstellt. Me hätti chöne döt nahluege)
- D’Siite isch volle mit Puns und komische Ussage.
- Es git kei AGB’s, nur en Fake «Datenschutz» Teil wo als Erschts stat: «Ihre Daten sind bei uns sehr sicher aufgehoben. Wir schwören das, auf alles.» und witer une im Rescht vom Copy-Pasted Dateschutz übergisch üs no dini Seele.
- Es git kei Navigation, kein Warechorb, kein Login.
- Anhand vom simple Fakt dass ich Lichtmacher gmacht han, söt me mit ere fette prise Salz uft Siite ga, es isch uf minere Domain und isch NIRGENDS uf de Siite verlinkt, me chunt nur über de Link vom Tweet druf.
De «Shop» han ich jetzt offline gno und er zeigt uf de Blogitrag, du chasch ihn dir aber immerno im Web Archive aluege. Du chasch au eifach witerlese für e Zämmefassig und min Gedankegang während em Erstelle vom Rage Bait:
Bim verfasse vom Text han ich druf g’achtet, so viil vo de folgende triggernde Element wie möglich z’nutze:
- E massivi Nachfrag insziniere zum d’Selbstdenker i ihrem Weltbild, dass de Rescht vo de Welt chrank isch, bestätige und sie somit hässig z’mache.
- Luschtig mache über «Eidgenosse».
- Über Ametis «Jesus-Exekution» so viil Puns und Witzli mache wies gat.
- Christofaschismus so oft wie möglich erwähne, es ufsteigendes Thema bi üs dreckige Lefties und glichzitig en Talking Point, über de sich Rechti ufreget.
- Mir mönd das Ganze no irgendwie «Woke» mache für extra hässigi Schizos.
Was au wichtig gsi isch, sind Meme-Zahle, biblischi Puns und dass alli Inahme a (für Rechti) hässig machendi und erfundeni Zweck gönd. (Awält für angeblichi Jesus-Hasser, Asylheim, LGBTQ)
Bi dem «subtilere» designte Merchandise für 69.90.- gits paar Siitehieb geg Konservativi und d’Inahme gönd ad Bewohner vo eme Asylheim, spezifisch für neui iPhone 15, demit sie sich wohl fühlet.
De LGBTQ Hoodie für 420.- söt am ganze no s’i-Tüpfelchen verleihe. Wie mir alli wüsset, händs die Lüüt nöd so mit de LGBTQ-Community. Spende von dem Produkt gönd a e angeblichi Kindertagesstätte exklusiv für Trans Chinde.
Au üses super cools Meme-Merchandise isch bi üsere nöd-existierende Kundschaft extrem bliebt gsi!
Spötischtens bi üsere «Häufig gestellte Fragen» Sektion müsstet doch d’Alarmglocke lüüte, wür me zumindescht bi eme seriöse Journalist wie Philipp meine.
Schlussendlich han ich als letschte Trigger s’Antifa Logo une im Footer platziert.
Erschti Brichterstattig uf Telegram
Mini gröschte Telegram-Fans Shipi und «Atilla der Kluge» aka Jean-Marc sind, nebe paar random Telegram Chatter, natürlich die Erschte gsi wo am 14. September (3 Täg nach mim Tweet) drüber brichtet händ.
Das witzigschte (oder truurigschte) a dem isch, dass Jean-Marc JEDES EINZELNE Element wo ich zum die Lüüt triggere ineta han Rot unterstriche hät! Me chönt meine Jean-Marc isch mini chli Handpuppe, aber mini Hand isch gar nöd i sim Arsch.
Das wärs eigentlich au scho gsi mit üsem chline Streich fürd Schwurblis und üses Ziel isch erreicht gsi… wär da nöd die super legitim unbiased Ziitschrift DIE WELTWOCHE, wo usschlüsslich mega qualifizierti Journaliste für sich schriibe lat.
Zwei Täg spöter: Weltwuche Artikel
D’Weltwuche hät zwei Täg spöter en Artikel veröffentlicht, de meh als 300 Kommentär becho hät. Wieso ich mir ziemlich sicher bin, dass Phillip Gut entweder direkt oder indirekt durch Telegram uf d’Siite cho isch?
Min Tweet hät fascht kei Richwiiti gha. Ja, er hät 40 Likes, 2000 Impressione und 5 Reposts. Aber: 25 vo dene Likes und 1000 Views han ich kauft zums Engagement Fake als ich de Tweet usela han, ~10 devo sind vo minere Discord Community wo no Twitter Accounts händ und de Rescht sind paar Lüüt wo checkt händ, dass es en Prank isch. Die paar Comments drunder sind ebefalls vo de Community bis uf die offesichtlich Hässige wo ersch nach em 14. September dezuecho sind, genau so wie de Grossteil vo de reschtliche Impressione.
Was d’Retweets agat, gsen ich bi mir us eme Grund nur zwei, und eine devo isch SVP Urgestein Claudio Zanetti. Wie er wohl churz nach de Telegram-Coverage uf min Tweet cho isch?
De Weltwuche Artikel bestätigt, dass Philipp die ganz Siite im Detail agluegt hät. s’Chliidruckte une a de Siite, de Footer, d’Frage, Produktbeschriebige. Und er isch trotzdem nöd uft Idee cho, mich zumindescht z’kontaktiere und weg em Verkauf vom Merchandise z’befröge. Wieso au? Er isch kein richtige Journalist. Er isch numme eine vo de Hatemonger fürt Weltwuche.
Au da isch wichtig z’erwähne, dass Philipp so ziemlich jede Punkt, de ich zum Triggere vo de Telegramnutzer igfüegt han, extra erwähnt hät:
- Antifa Logo
- De Priis (66,60) vom Shirt. Die Telegram-Masterminds sind ebe verdammt guet im Muschter erkenne!
- De sarkastisch Text.
- s’Geld für Awält hät ihn au sehr hässig gmacht.
Er hät ja susch nüt anders z’erwähne. Sini Recherche hät drus bestande, d’Siite z’öffne und alles wo döt stat für Face Value z’ne. Mir Lefties sind ja so bösartig, das muen alles Stimme!
Usserdem hät er im Artikel d’Siite nöd mal verlinkt, demit sini Leser sich uf keim Fall es eigenes Bild vo de Sach mache chönd. (cue ominösi Hintergrundmusik)
Ich han sit de Artikel ussecho isch tusigi Bsuecher uf de Siite gha, wo vergeblich nach em Shop gsuecht händ. Aber de han ich ja mit Absicht nirgends verlinkt.
D’Kommentarspalte bi dem Artikel isch wie erwartet absolut Unhinged. I de über 300 Kommentär han ich nur eine gse, de en Huuch vo Intelligenz zur Schau gstellt hät:
Schlusswort
De Plan isch eigentlich gsi, üs wege paar hässige Telegramnutzer is Füüschtli z’lache. Leider sind Weltwuche «Journaliste» kein Scheiss besser als die armseelige Gstalte wo ihri eigene Telegramkanäl betriibet und brichtet tatsächlich über en Fake Shop ohni (wies sich für e seriösi Zitig ghöre wür) zumindescht für e Stellignahm z’bitte.
Und denn muen ich so Blogposts verfasse, zum d’Weltwuche und ihren Bullshit expose.
